அவசர எச்சரிக்கை அமைப்பு (Alert Ready) நாடு முழுவதும் புதன்கிழமை சோதனை
நாட்டின் தேசிய அவசர எச்சரிக்கை அமைப்பான Alert Ready இவ்வாண்டின் இரண்டாவது சோதனையை நடத்தும் போது, புதன்கிழமை கனடியர்களின் கைத்தொலைபேசிகள், தொலைக்காட்சிகள், வானொலிகள் ஒலிக்கும்.
நவம்பர் 18 ஆம் திகதி, அனைத்து மாகாணங்களிலும் பிரதேசங்களிலும் தொலைக்காட்சி, வானொலி மற்றும் LTE அல்லது 5G வலையமைப்புடன் (network) இணைந்த எந்தவொரு கைக்கருவியிலும் எச்சரிக்கை ஒலியும் அதனுடன் செய்தியும் ஒளிபரப்பப்படும். அமைப்பு சரியாக இயங்குகிறதா எனச் சோதிப்பதும், அவசர எச்சரிக்கைகள் பற்றிய பொதுமக்கள் விழிப்புணர்வை வலுப்படுத்துவதும் இச்சோதனையின் நோக்கம்.
சோதனை நடைபெறும் உள்ளூர் நேரங்கள்: பிரிட்டிஷ் கொலம்பியா, ஆல்பர்ட்டா, சஸ்காட்சுவான், மனிடோபா, கியூபெக், நோவா ஸ்கோஷியா, வடமேற்குப் பிரதேசங்கள், யூக்கோன், நூனாவுட் ஆகியவற்றில் பிற்பகல் 1:55; ஒன்டாரியோ மற்றும் பிரின்ஸ் எட்வர்டு தீவில் பிற்பகல் 12:55; நியூ பிரன்ஸ்விக்கில் முற்பகல் 10:55; நியூஃபவுண்ட்லாந்து மற்றும் லாப்ரடோரில் முற்பகல் 9:55.
சூறாவளி (tornadoes), வெள்ளம், காட்டுத்தீ (wildfires) மற்றும் Amber Alert-கள் உட்பட அவசரநிலைகள் பற்றிப் பொதுமக்களுக்கு எச்சரிக்கை வழங்க அரசாங்கங்கள் இவ்வெச்சரிக்கைகளைப் பயன்படுத்துகின்றன. சோதனை எச்சரிக்கையையோ Alert Ready அமைப்பையோ மக்கள் நிராகரிக்க (opt out) முடியாது.
இவ்வமைப்பு வழக்கமாக வருடத்துக்கு இருமுறை, மே மற்றும் நவம்பர் மாதங்களில் சோதிக்கப்படுகிறது. இவ்வாண்டின் முந்தைய சோதனை மே 6 ஆம் திகதி நடைபெற்றது. பொதுச் சோதனைக்கு முன்னர் சில சேவையாளர்கள் (carriers) தங்கள் சொந்த அமைப்புகளின் அமைதியான சோதனைகளை நடத்தலாம்.