நியூகாஸில் (Newcastle) ரக்பி ரசிகர் கூட்டத்திற்குள் கார் புகுந்து 10 பேர் காயம் - இலங்கை வம்சாவளி இளைஞன் கைது
அவுஸ்திரேலியாவின் நியூகாஸில் (Newcastle) பகுதியில் ரக்பி லீக் (rugby league) ரசிகர்களின் கூட்டத்திற்குள் கார் ஒன்று புகுந்ததில் மூன்று சிறுவர்கள் உட்பட 10 பேர் காயமடைந்தனர்.
சனிக்கிழமை காலை சுமார் 9.30 மணியளவில், நியூகாஸிலின் லிங்க் வீதியிலுள்ள (Link Road) டிரான்ஸ்ஃபீல்ட் அவென்யூ (Transfield Avenue) பகுதியில் இந்தச் சம்பவம் இடம்பெற்றது. நியூகாஸில் நைட்ஸ் (Newcastle Knights) அணியின் ஆதரவாளர்கள் ஆயிரக்கணக்கானோர், தங்கள் நகரத்தின் தேசிய ரக்பி லீக் (NRL) அணியினரை வழியனுப்பி வைப்பதற்காக அங்குக் கூடியிருந்தனர்.
இதன்போது வாகனத்தின் மீதான கட்டுப்பாட்டை இழந்த ஓட்டுநர் பல ஆதரவாளர்கள் மீது மோதியதாகப் பொலிஸார் தெரிவித்துள்ளனர். காயமடைந்தவர்கள் வைத்தியசாலையில் அனுமதிக்கப்பட்டனர்.
இந்தச் சம்பவத்தைத் தொடர்ந்து, இலங்கையைப் பின்புலமாகக் கொண்ட 18 வயது இளைஞன் இந்திக்க சமரசிங்க (Indika Samarasinghe) கைது செய்யப்பட்டு, அவர் மீது ஆபத்தான முறையில் வாகனம் ஓட்டிக் கடும் காயத்தை ஏற்படுத்தியமை மற்றும் தவறான நடத்தையால் காயத்தை ஏற்படுத்தியமை உள்ளிட்ட மூன்று குற்றச்சாட்டுகள் பதிவு செய்யப்பட்டுள்ளன.
மிகவும் தீவிரமான ஆபத்தான முறையில் வாகனம் ஓட்டிய குற்றச்சாட்டுக்கு அதிகபட்சமாக ஏழு ஆண்டுகள் சிறைத்தண்டனை விதிக்கப்படும் சாத்தியம் உள்ளதாகத் தெரிவிக்கப்படுகிறது. சமரசிங்க ஒக்டோபர் 15ஆம் திகதி மீண்டும் நீதிமன்றத்தில் முன்னிலைப்படுத்தப்படவுள்ளார்.
