காற்று மாசுபாடு (air pollution): நுரையீரல், இதயம், மூளை வரை ஏற்படும் உடல்நலப் பாதிப்புகள் என்ன?
காற்று மாசுபாடு (air pollution) வெறும் சுற்றுச்சூழல் பிரச்னை அல்ல; அது மனித உடல்நலத்தையும் தீவிரமாகப் பாதிக்கக்கூடியது. காற்று மாசுபாட்டில் உள்ள பிஎம்2.5 (PM2.5) எனப்படும் மிக நுண்ணிய துகள்கள், மூக்கு மற்றும் மேல் சுவாசப் பாதையின் இயற்கை பாதுகாப்பு அமைப்புகளையும் தாண்டி, நுரையீரலில் உள்ள அல்வியோலை (alveoli) எனப்படும் காற்றுப் பைகளில் படிந்து, அங்கிருந்து ரத்த ஓட்டத்தில் கலந்து பிற உறுப்புகளையும் பாதிக்கக்கூடும் என்று நுரையீரல் மருத்துவர் மாளவிகா (Dr. Malavika) விளக்குகிறார்.
நுரையீரலில், கடுமையான சுவாசப் பாதை அழற்சி (airway inflammation), மூச்சுக்குழாய் சுருக்கம் (bronchospasm), மூச்சுத் திணறல், விசில் போன்ற சத்தம் (wheezing) ஆகியவை ஏற்படலாம். ஏற்கெனவே ஆஸ்துமா (asthma) அல்லது நாள்பட்ட நுரையீரல் அடைப்பு நோய் (COPD) பாதிப்பு உள்ளவர்களுக்கு நோயின் தீவிரம் அதிகரிக்கலாம்; திடீர் ஆஸ்துமா தாக்குதல்களும் ஏற்படலாம். இதயத்தைப் பொறுத்தவரை, இதயத் துடிப்பு மற்றும் ரத்த அழுத்தத்தில் மாற்றங்கள் ஏற்படலாம்; ரத்த நாளங்களில் ஆக்சிஜனேற்ற அழுத்தம் (oxidative stress) அதிகரித்து ரத்தம் உறைதல் (blood clot formation) ஆகிய அபாயங்கள் உயரலாம். உடல் முழுவதும் ஏற்படும் அழற்சி (systemic inflammation) மற்றும் ரத்த நாளங்களின் செயல்பாட்டுக் குறைபாடு (vascular dysfunction) ஆகியவை பக்கவாதத்திற்கான (stroke) அபாயத்தையும் அதிகரிக்கின்றன.
நீண்டகாலப் பாதிப்புகளைப் பொறுத்தவரை, பிஎம்2.5 துகள்கள் நுரையீரல் புற்றுநோய்க்கான முக்கிய சுற்றுச்சூழல் அபாயக் காரணியாக அங்கீகரிக்கப்பட்டுள்ளன; புகைப் பிடிப்பது மட்டுமே நுரையீரல் புற்றுநோய்க்குக் காரணம் அல்ல என்று மருத்துவர் மாளவிகா சுட்டிக்காட்டுகிறார். தொடர்ந்து மாசுபாட்டுக்கு ஆளாவோருக்கு சளியுடன் கூடிய இருமல், உடலுழைப்பின் போது தாங்கும் திறன் குறைதல், அடிக்கடி ஏற்படும் சுவாசப் பாதைத் தொற்றுகள், படிப்படியாக அதிகரிக்கும் மூச்சுத் திணறல் போன்ற அறிகுறிகள் ஏற்படலாம். மாசுபாடு, உயிரி எரிபொருட் புகை (biomass fuel exposure), பணியிட தூசு வெளிப்பாடு (occupational dust exposure) ஆகியவை இணைந்தால் சிஓபிடி நோயாளிகளுக்கு மருத்துவமனையில் அனுமதிக்கப்படும் நிலைகூட அதிகரிக்கலாம்.
எனினும், குறுகிய கால வெளிப்பாட்டால் அனைவருக்கும் நிரந்தர நுரையீரல் சேதம் ஏற்படும் என்று சொல்ல முடியாது என்கிறார் அவர். லேசான அழற்சி மற்றும் எரிச்சல் பெரும்பாலும் தற்காலிகமானவை; வெளிப்பாடு நின்றால் மேம்படக்கூடியவை (reversible). ஆனால் நுரையீரல் திசுக்களில் தழும்பு ஏற்படும் நிலை (fibrosis) உருவாகிவிட்டால், அது மேலதிக பாதிப்புகளுக்கு வழிவகுக்கும்.
சிகிச்சையைப் பொறுத்தவரை, மூச்சுக்குழாயை விரிவடையச் செய்யும் மருந்துகள் (bronchodilators), ஆக்சிஜன் சிகிச்சை (oxygen therapy), நுரையீரல் மறுவாழ்வுப் பயிற்சி (pulmonary rehabilitation) ஆகியவை பாதிப்பின் தீவிரத்திற்கு ஏற்ப அளிக்கப்படலாம். ஆனால் முன்னெச்சரிக்கையாகவே ஆன்டிபயாட்டிக்ஸ் (antibiotics), ஸ்டிராய்டுகள் (steroids), நெபுலைசேஷன் (nebulization) போன்ற சிகிச்சைகளை சுயமாக எடுத்துக்கொள்ளத் தேவையில்லை; அறிகுறிகள் மற்றும் மருத்துவப் பரிசோதனைகளின் அடிப்படையில் மட்டுமே சிகிச்சை எடுக்க வேண்டும் என்று அவர் அறிவுறுத்துகிறார். மூச்சுத் திணறல் திடீரென அதிகரித்தல் போன்ற கடுமையான அறிகுறிகள் தென்பட்டால், தாமதிக்காமல் அருகிலுள்ள மருத்துவமனைக்குச் செல்ல வேண்டும் என்றும் அவர் எச்சரிக்கிறார்.