அவுஸ்திரேலியாவில் முதன்முறையாகப் பாலூட்டி விலங்கில் எச்5என்1 (H5N1) பறவைக் காய்ச்சல் தொற்று உறுதி

அவுஸ்திரேலியாவில் முதன்முறையாகப் பாலூட்டி விலங்கொன்றில் எச்5என்1 (H5N1) பறவைக் காய்ச்சல் (bird flu) தொற்று கண்டறியப்பட்டுள்ளதாக அதிகாரபூர்வமாக உறுதிப்படுத்தப்பட்டுள்ளது.

தெற்கு அவுஸ்திரேலியாவின் (South Australia) பீச்போர்ட் (Beachport) கடலோரப் பகுதியில் இறந்த நிலையில் கண்டெடுக்கப்பட்ட நீண்ட மூக்குக் கடல்நாய் (long-nosed fur seal) ஒன்றிலேயே இத்தொற்று பரவியிருப்பது உறுதி செய்யப்பட்டுள்ளது.

காட்டுப் பறவைகள் மூலமே இந்த வைரஸ் (virus) கடல்நாய்க்குப் பரவியிருக்கலாம் எனச் சந்தேகிக்கப்படும் நிலையில், நாட்டின் விவசாயத்துறை அல்லது பண்ணை விலங்குகளுக்கு இத்தொற்று இதுவரை பரவவில்லை என அவுஸ்திரேலிய மத்திய அரசு தெரிவித்துள்ளது.

வனவிலங்குகளிடையே இந்நோய் பரவுவதைத் தடுப்பது கடினம் எனக் குறிப்பிட்டுள்ள அதிகாரிகள், பொதுமக்களுக்கு இதனால் ஏற்படும் சுகாதார ஆபத்து மிகக் குறைவாகவே உள்ளது எனவும் சுட்டிக்காட்டியுள்ளனர். தொற்று கண்டறியப்பட்ட பகுதியில் கண்காணிப்பு நடவடிக்கைகள் தொடர்ந்து மேற்கொள்ளப்பட்டு வருகின்றன.

அவுஸ்திரேலியாவில் இதுவரை பண்ணைப் பறவைகள் அல்லது ஏனைய பாலூட்டி விலங்குகளில் இவ்வைரஸ் கண்டறியப்படாத நிலையில், கடல்நாய் ஒன்றில் உறுதி செய்யப்பட்ட இத்தொற்றே நாட்டின் முதல் பாலூட்டி தொற்றாகப் பதிவாகியுள்ளது. கடலோரப் பகுதிகளில் இறந்த வனவிலங்குகள் காணப்பட்டால், அவற்றைத் தொடாமல் சம்பந்தப்பட்ட அதிகாரிகளுக்குத் தகவல் தெரிவிக்குமாறு சுகாதார அதிகாரிகள் பொதுமக்களை அறிவுறுத்தியுள்ளனர்.