2025 வரவுசெலவுத் திட்டத்தின் அதிக மதிப்பு முன்மொழிவுகளில் 40% போதிய அளவில் நடைமுறைப்படுத்தப்படவில்லை: ஆய்வறிக்கை

இலங்கையின் 2025 வரவுசெலவுத் திட்டத்தில் (Budget) முன்வைக்கப்பட்ட 36 அதிக மதிப்புடைய முன்மொழிவுகளில் 14, அதாவது சுமார் 40 வீதம், போதிய அளவில் நடைமுறைப்படுத்தப்படவில்லை என வெரிட்டே ரிசர்ச் (Verité Research) ஆராய்ச்சி நிறுவனத்தின் பட்ஜட் ப்ராமிசஸ் (Budget Promises) புதிய மதிப்பீட்டில் தெரிவிக்கப்பட்டுள்ளது.

அதேவேளை, முழுமையாக நிறைவேற்றப்பட்ட முன்மொழிவுகளின் வீதம் 2024 ஆம் ஆண்டில் 17% ஆக இருந்த நிலையில் 2025 இல் 33% ஆக உயர்ந்து, 2017 இல் கண்காணிப்பு ஆரம்பித்ததிலிருந்து அதிகபட்ச மட்டத்தை எட்டியுள்ளது. ஒட்டுமொத்தமாக 41% (15 முன்மொழிவுகள்) நிறைவேற்றப்பட்டிருந்தன அல்லது பெரும்பாலும் நடைமுறைப்படுத்தப்பட்டிருந்தன. வரவுசெலவுத் திட்டம் பெப்ரவரி 2025 இல் சமர்ப்பிக்கப்பட்டதால் வழமையிலும் குறைந்த நடைமுறைப்படுத்தும் கால அவகாசமே கிடைத்திருந்த போதிலும் இந்த முன்னேற்றம் பதிவு செய்யப்பட்டுள்ளது.

மேலும் 19% (7 முன்மொழிவுகள்) பற்றிய போதிய தகவல்கள் கிடைக்காததால் அவை வெளியிடப்படாதவை என வகைப்படுத்தப்பட்டுள்ளன. மதிப்பீட்டில் 500 மில்லியன் ரூபா அல்லது அதற்கு மேற்பட்ட மதிப்புடைய 36 முன்மொழிவுகள் கண்காணிக்கப்பட்டன; அவற்றின் மொத்த ஒதுக்கீடு 212 பில்லியன் ரூபா ஆகும்.

வெளிப்படைத்தன்மையிலும் குறிப்பிடத்தக்க முன்னேற்றம் காணப்பட்டது. முன்மொழிவுகளில் மூன்றில் இரண்டுக்கு அருகாமையிலான 64% திறந்த தரவரிசையைப் பெற்றன; 2017 க்குப் பின்னர் முதல் முறையாக எந்த முன்மொழிவும் மூடப்பட்டது என தரவரிசைப்படுத்தப்படவில்லை. அதாவது, முன்னேற்றத்தை மதிப்பிட போதாத நிலையிலாவது, ஒவ்வொரு முன்மொழிவு பற்றியும் ஏதேனும் தகவல் கிடைத்தது. பட்ஜட் ப்ராமிசஸ் (Budget Promises) என்பது 2017 முதல் இலங்கையின் வருடாந்திர வரவுசெலவு உரைகளில் முன்வைக்கப்படும் முன்மொழிவுகளின் நடைமுறைப்படுத்தலைக் கண்காணிக்கும் பொதுநிதி கண்காணிப்புத் தளமாகும்.