நானூறு ஆண்டு பழமையான பூட்டின் இரகசியத்தை வெளிக்கொணர்ந்த நுண் கணினிப் படமெடுப்பு (micro-CT scanning)

வேல்ஸின் (Wales) கடற்கரையில் கண்டெடுக்கப்பட்ட பழமையான எண் அமைப்புப் பூட்டின் (combination lock) உள் அமைப்பை, நுண் கணினிப் படமெடுப்பு (micro-CT scanning) மூலம் நிபுணர்கள் ஆராய்ந்து அதன் குறியீட்டைக் கண்டறிந்துள்ளனர். உலோகக் கண்டறியும் கருவியுடன் (metal detector) நீண்டகாலமாகத் தேடலில் ஈடுபட்ட பீட்டர் ஹியூஸ் (Peter Hughes) என்பவரால் பூட்டு கண்டெடுக்கப்பட்டது. பல தசாப்தங்களாகத் தம்மால் திறக்க முடியாத புதிருக்கு தொழில்நுட்பம் விடை தந்துள்ளதாக அவர் மகிழ்ச்சி தெரிவித்துள்ளார்.

வேல்ஸ் தேசிய அருங்காட்சியகம் (National Museum Wales), கார்டிஃப் பல்கலைக்கழகம் (Cardiff University) ஆகியவற்றின் நிபுணர்கள் இந்தப் பணியில் ஈடுபட்டனர். சிறிய பொருட்களின் உட்புற அமைப்பைப் பார்க்கப் பயன்படும் கருவியால், பூட்டைச் சேதப்படுத்தாமல் அதனுள் இருந்த எழுத்துகளைப் பார்க்க முடிந்ததாக ஆராய்ச்சியாளர் டேவிட் வில்லியம்ஸ் (David Williams) விளக்கினார். வெவ்வேறு அணுகுமுறைகளில் மேற்கொண்ட படமெடுப்புகளுக்குப் பின்னர் குறியீடுகள் தெளிவானதாக அவர் கூறினார்.

பூட்டின் நான்கு சுழல் வளையங்களிலும் தலா ஆறு எழுத்துகள் உள்ளதால் மொத்தம் 1,296 விதமான சேர்க்கைகள் அமையலாம். இரு முனைகளிலும் அசையாத எழுத்துகள் இருப்பதும் தேடுபவரைக் குழப்பக்கூடிய அம்சமாகும். ஆவணங்கள் அல்லது துணிகள் போன்றவற்றை வைத்திருந்த சிறிய பெட்டியைப் பாதுகாக்க இது பயன்படுத்தப்பட்டிருக்கலாம் என நிபுணர்கள் கருதுகின்றனர். அந்தப் பெட்டியில் உண்மையில் என்ன இருந்தது என்பது தெரியவில்லை. பல நூற்றாண்டுகள் கடந்த பின்னரும் பூட்டின் செயற்பாடு நல்ல நிலையில் இருப்பதாக அருங்காட்சியகக் காப்பாளர் தெரிவித்துள்ளார். வரலாற்றுப் பொருட்களை உடைக்காமல் ஆராய நவீன தொழில்நுட்பம் எவ்வாறு உதவுகிறது என்பதை இம்முயற்சி காட்டுகிறது.